卿姐無興趣做黨主席

【明報專訊】民主黨因為選舉失利，主席何俊仁辭職，代主席劉慧卿噚日同Emily茶敘，佢話自己「無經驗、無能力、無興趣」接任，希望有能力嘅黨員，尤其係年輕一輩出嚟，透過呢幾個月黨內辯論競爭，表現自己嘅能力。不過，卿姐都無封後門，話到今年12月換屆，佢唔排除會出嚟選嘅可能喎。


卿姐擔任多屆立法會財委會主席，財委會負責審批政府撥款申請，而噚日佢都話會諗吓連任，但相信其他黨員都無興趣選。另外民主黨會喺呢個幾禮拜，同泛民其他黨派傾內務委員會、事務委員會人選。


讚劉江華輸得有風度

對於老對手民建聯劉江華落選，卿姐引述街坊話「仲開心過我選到」，坦言「唔知點解佢樹敵咁多，都幾本事」。不過話鋒一轉，卿姐覺得劉江華輸咗都表現好有風度，認為從政者都要學習。


大罵大班「投桃報李」論

另外，鄭經翰（大班）禮拜三（12日）喺《信報》寫文，評論中聯辦因為民主黨接受政改方案，所以「投桃報李」力保仁哥同阿涂當選。卿姐見到眼火爆，話呢個指控係「陰毒、可恥、荒謬」。卿姐話，民主黨一直以為清者自清，所以罵不還口，但都忍唔住要「還拖」。總幹事林卓廷就話，市民見到民主黨唔反駁，「無理由幫你出聲（澄清）」。卿姐話民主黨家會檢討，將來面對抹黑就要出嚟解釋，「同佢搏過」，仲話如果大班有證據就攞出嚟，唔係就要收返言論同道歉。