溫商購美銀行 老作變逃犯

【明報專訊】小琴噚日見到有篇報道，話有個溫州商人林春平因為涉嫌虛假使用增值稅專用發票，涉及數額巨大而被公安調查，林春平已經響上個月畏罪潛逃。


睇到呢單新聞，小琴真係覺得好鬼有戲劇性，事關呢個賣米嘅林春平響短短半年唔到，就由神話變笑話再變埋逃犯。


今年初，呢位林生聲稱用咗6000萬美金收購美國特拉華州一間有85年歷史嘅大西洋銀行，仲改名叫美國新匯豐銀行。


藉住呢個創舉，林春平仲做埋溫州市政協委員，風頭一時無兩，但今年3月初，官方新華社實地調查發現佢所謂收購美國銀行一事竟然係老作。


勢估唔到係呢場林春平鬧劇原來未完，內地媒體話溫州警方已經成立專案小組，調查林春平旗下幾間公司自2011年起涉嫌虛假使用增值稅專用發票，用嚟詐騙出口退稅嘅商業案件，初步計算涉及金額可能有成億。而林春平更加響上個月底走咗佬，家已經畀警方通緝。