耀才批同行阻期指夜市

【明報專訊】港交所（0388）嚟緊諗住下半年搞期指夜市，有班本地券商就話咪搞，據講今日仲會同CY食晏，叫佢上任之後阻止港交所咁做。向來係證券界「惹火尤物」嘅耀才證券（1428），噚日突然出份新聞稿，唔算好有修飾，但用字夠晒過癮。


份稿講到明，香港唔搞期指夜市，間間證券行就聽住齊齊「攬炒」（同歸於盡）。佢哋好寸咁話，反對延長交易時間嘅同業，唔想花資源、不思進取，但又驚畀市場淘汰，於是成日出嚟嗌反對，最終係損人不利己。


最希望24小時交易

耀才仲舉例咁話，萬一美國道指晚黑開市後跌成千點，港股無夜市畀人「跳車」，啲散戶實走唔切，被大戶魚肉咁話，仲話最希望期貨市場有24小時交易㖭。


至於，一向畀同行炮轟嘅低佣策略，耀才再次呼冤，話未取消最低佣金制之前，間間行都出埋唔少優惠去搶客。當年大家已鬥到爛咁滯，仲話到明宜家搞個「佣金二級制」係無意義兼走回頭路。


小琴覺得份稿嘅語氣，有啲似啲激進黨派，喺街頭叫口號咁。唔知係咪激動咗啲，份稿頭兩段疑似「Copy & Paste」一模一樣。小琴又聽到個朋友講，之所以耀才咁支持延長交易時間，皆因佢哋使咗唔少錢喺套交易系統上面，家已經全自動化，根本唔使擺好多人喺度睇住，自然大把本錢同其他證券行鬥。


email:piano@mingpao.com