新聞類別
財經
詳情#
【明報專訊】講起摩天輪，大家都會唸到遊樂場，不過小琴上個禮拜喺桂林參觀花樣年（1777）新項目，先知道原來佢哋準備喺本月開盤嘅「麓湖國際」豪宅區，引進一個大大個嘅摩天輪。不單止咁，摩天輪所在嘅湖心島上仲可以擺到130幾圍枱，成個場地專為婚慶設宴打造，小琴聽到都不禁浮想聯翩。
湖心島仔夠擺過百圍婚宴
麓湖國際一共佔地1000畝，齋係挖個人工湖已經用咗300畝地皮，不過花樣年老總潘軍就話，湖心個島仔同摩天輪就構成完美嘅婚慶景致，相信落成後一定大受歡迎，咁樣嘅設計好值得。
佢仲話，當初產生呢個構思，係因為相信「愛情和婚姻才是生命的最初目標」，搞到小琴聽完覺得個摩天輪簡直帶有小小「剛需」成份。
不過又難怪，家陣內地賣樓唔容易，要吸引挑剔嘅高端客群更加要花足心思。
為咗提高品牌吸引力，花樣年仲話會全力探索服務新領域，譬如喺小區增設國際幼稚園、養老公寓，同時推廣文化旅遊，仲有可能同人合作搞醫院、開設服務業專科院校添。
潘軍愈講愈有激情，中途仲毫不客氣咁直指香港地產商「極缺乏競爭力」，啲樓盤最多得個靚字，完全冇創新迹象。
考慮「人生不同階段」
又難怪佢咁得意洋洋，中國房地產市場商品化都只不過經歷咗短短15年，開發商就已經主動為客戶考慮埋「人生不同階段」嘅設施同服務。唔知有冇地產商會從呢個摩天輪身上找到些少靈感，都躍躍欲試，想喺香港「搞搞新意思」呢？
email:piano@mingpao.com
回應 (0)
