王曉初﹕水果店不單賣蘋果

【明報專訊】蘋果嘅iPhone威力人人都知，就算傳聞話蘋果同班電訊商，簽嘅賣iPhone合約條件好辣，都仲係有好多電訊商要搞返嚟當鎮山之寶。話說中電信（0728）今年有得賣iPhone 4S後，市場上有人質疑手機補貼咁貴，會唔會吃完蘋果都消化不良。


「沒有iPhone的時候，就要有iPhone；有iPhone了，就要有盈利」。董事長王曉初噚日同小琴呻，話已經盡量迎合、做足晒嘢，但市場對佢哋仲係多多要求，佢講笑咁話，到底大家想班管理層點？


一向風趣嘅王總仲話，中電信好似間水果舖咁，入面有唔同品種嘅水果，「蘋果是所有水果中，一種重要的水果」。不過，集團唔止得一種賣，仲有西瓜、葡萄等畀啲客揀，唔係押重注喺iPhone上面。


小琴覺得，如果真係撈埋水果嗰瓣，話唔定以中電信個網絡，都可能真係有得諗㗎。