總部快約滿 地監局被「逼遷」

【明報專訊】現時樓價高，原來唔止80後年輕人上唔到車，就連地產代理監管局（地監局）都嘆上車難。小琴早排就同前地監局行政總裁余呂杏茜傾過偈，佢話地監局其實一直都諗過買樓，因為香港辦公室租金貴，所以對於收入唔穩定嘅地監局嚟講，真係造成唔少財務壓力。不過佢又講過，地監局始終係公職機構，所以任何投資都要事先諮詢財政司司長，而且該局只得2000幾萬儲備可以作置業之用，根本負擔唔到合適物業，只可以將儲備做定期存款，不過息口咁低，真係年年都跑輸通脹。


到最近，地監局租用嘅合和中心樓層就快約滿啦﹗該局就宣布，董事局已經成立咗個專責小組，同埋委任一間地產代理公司研究市場趨勢同租金水平，再決定續唔續租家嘅辦公室。不過以家個時勢睇，就算地監局今年搬出合和避貴租，當局一日買唔到樓，遲吓都係避免唔到再畀業主加租嘅情况。