港老闆讀求職信亞洲最快

【明報專訊】家陣搵工唔易，求職信大家梗係會精心炮製。不過，你有無諗過，寄出嘅求職信，公司高層會睇幾耐？


今日小琴同各位討論吓香港最熱門嘅行業——金融、會計同埋銀行。呢啲行業搵人，通常由人力資源部初選，再交畀公司財務總監作出最終決定。根據招聘公司Robert Half 噚日發布嘅調查結果，香港財務總監睇一封求職信，並決定是否聘用，所花費嘅平均時間係8分25秒；其中三成老闆更加只需要1至5分鐘。


快過全球平均近3分鐘

根據呢份報告，香港老闆睇求職信速度之快冠絕亞洲。新加坡同業需要9分32秒，日本老細10分51秒，中國內地更加超出11分17秒嘅全球平均水準，需要12分17秒。全球來講，香港老闆屈居第二，僅次於阿拉伯酋長國迪拜，當地嘅財務總監睇簡歷只需要6分44秒，而閱讀時間最長嘅係瑞士，平均要14分46秒。


Robert Half 香港區總裁安柏菲提供咗一份寫求職信嘅貼士。


第一、長度不要超過2頁；

第二、要列出過去嘅技能同素質，即使目前並無使用；

第三、避免提及無關緊要嘅興趣，或過分闡述宗教信仰、政治傾向等問題，亦不要羅列所有參與嘅培訓課程；總之，要度身訂做，考慮你提供嘅資料是否對應徵職位有直接影響。