新聞類別
財經
詳情#
【明報專訊】早排有個乜乜人生導師，教人用45度視線去追女仔，真係得啖笑。其實幾多度唔係重點，亦都無乜科學根據，但如果拎45卡嘅鑽石出嚟追女仔，小琴覺得成功率會大好多囉。
噚日鑽石商格拉夫（Graff，1306 ）搞咗個新股推介會，上到去仲以為入錯門口。事關成個會場嘅佈置，就好似個小型鑽飾展咁。大會特登用黑色主調突顯鑽石有幾閃，再襯埋格拉夫嘅主色翠綠色，感覺grand到爆。
百卡巨鑽 如鵝蛋
今次推介會，格拉夫都算出盡心思。除咗有唔同顏色嘅鑽石外，仲有嗰粒最矚目、成百幾卡嘅巨鑽，好似粒鵝蛋咁，真係睇到小琴眼都凸埋。更加難得嘅係，平時去親推介會，都有好多人講定價貴唔貴、抵唔抵買嗰啲，但噚日聽得最多嘅應該都係﹕「嘩！好閃呀，唔知幾錢呢？」
「其實我都係嚟睇吓啲鑽石咋。」一個喺私人銀行做嘅女性朋友就話，好多女「賓架」、分析員、基金經理咁，個個嘅焦點都係個首飾櫃。反而男嘅就企埋一邊，無計啦，鑽石對女人嚟講，從來都有種難以抗拒嘅魔力嘅。
email:piano@mingpao.com
回應 (0)
