財爺之後 陳德霖捧陳志雲場

【明報專訊】近日唔少疑似特首人選都入場欣賞由陳志雲主演嘅舞台劇《莎士對比亞》（圖一），繼日前財政司長曾俊華入場睇劇兼爆咗一句「to run or not to run, that is the question」，多年來不時被指係特首黑馬嘅金融管理局總裁陳德霖，噚晚亦同太太入場欣賞。近日政圈又再傳出陳德霖有意參選，「志雲大師」就喺facebook貼出合照，話「to run or not to run, that is the question. He didn't say a word」，即係陳德霖完全無回應參選特首嘅傳聞啦。


傳選特首 消息人士：流料

噚日有報道話陳德霖已部署選特首，仲話佢9月曾上京見港澳辦主任王光亞等，不過有接近陳德霖嘅消息人士話，報道係流料一則，透露陳德霖 9月有外訪，但就唔係去北京，又何來見京官之說呢。