陶傑引述午餐會發言 鄧永鏘批CY：衰過李鵬

【明報專訊】旺角暴力衝突事件，唔同人有唔同評論，而電台節目主持人陶傑噚日就喺facebook發帖，引述上海灘前老闆鄧永鏘爵士出席午餐會上嘅發言。鄧喺午餐會大罵特首梁振英（CY），話CY衰過1989年六四事件時嘅總理李鵬，因為李鵬當年都叫做見吓學生領袖吾爾開希，但CY就咁都唔做。鄧爵士又話旺角事件係因為積壓嘅民怨而起，但認為CY唔理。鄧爵士仲慨嘆香港嘅管治正在墮落，令香港陷入「可恥的狀態」。陶傑就話，鄧爵士發言鏗鏘有力，台下掌聲如雷。


鄧：施政報告「推動民主」係喜劇對白

話說，鄧爵士噚日喺外國記者午餐會演講，佢講到家香港社會發生「李波綁架」、黑社會橫行， 但香港人唔能夠接受現狀，必須捍衛香港原有嘅自由和法治。當時喺台下嘅陶傑就同Emily講，鄧爵士仲評論CY發表嘅《施政報告》，話「如果這份施政報告是一篇博士論文，而我是大學論文評審，我會將此文打回頭，叫這個學生返回幼稚園從頭讀起」。


鄧爵士仲好幽默，話施政報告侮辱香港嘅公民智慧，因為開頭一段話政府「推動民主」，而呢一句係喜劇對白！

陶傑勸政府查找不足

陶傑就同Emily講，鄧爵士以前比較少評論香港嘅事，亦算係中國人民嘅老朋友，家連鄧爵士都咁率直批評，或者特區政府應該查找不足一下。