粵語詞改標準漢語 習作惹質疑

【明報專訊】網上流傳一幅明愛粉嶺陳震夏中學中文科工作紙嘅圖片，上面有10條填充題，要求學生將粵語詞彙改寫成標準漢語，10個詞彙分別係頭殼、手板、冷衫、的士、巴士、取錄、質素、嘜頭、雪糕同冷氣（圖）。有網民指上述詞彙喺香港通用，質疑學校逼學生使用「大陸用語」。


屬中文科工作紙 校長：勿政治化

明愛粉嶺陳震夏中學校長何應翰話畀Emily知，撮圖的確係來自該校一份初中級中文科工作紙。佢話，工作紙除要求學生將口語改寫成書面語，亦會要求將書面語改寫成口語，「口語、書面語對譯，不存在邊種語重要啲」。何校長仲話，教師設計工作紙只會考慮學生學習語文嘅需要，期望助學生書寫更流暢嘅中文，「但唔係寫『的士』就唔流暢，有啲詞彙係約定俗成，係睇整篇文章」，強調考試唔會考核口語、書面語對譯，唔希望大眾將教育政治化。


中大中國語言及文學系副教授黃念欣解釋，標準漢語係指廣泛通行喺漢族社會嘅語言，包含「講」同「寫」，「講」係指北京話，「寫」係白話文，香港一直有教授標準漢語嘅白話文，而粵語詞彙就通常出現喺通俗刊物、大眾用語或現代文章創作，「兩種用語並行，無話邊個重要啲」。


Emily請黃念欣做一次啲題目，建議答案係1.頭顱、2.手掌、3.毛衣、4.計程車、5.公車、6.錄取、7.素質、8.商標、9.冰淇淋、10.空調。