竊聽3「主角」雲集鄉議局

【明報專訊】電影《竊聽風雲3》近日推出宣傳短片，曾江飾演嘅角色、鄉紳集團陸氏家族「陸瀚濤」，被指同鄉議局主席劉皇發平時講嘢嘅內容好相似，發叔噚日開鄉議局大會之後就以一句「咁客氣」回應。發叔大讚曾江靚仔過佢、高大威猛，仲話拍電影嘅人有自由，不過佢暫時無興趣睇呢套戲。至於電影係咪醜化新界人？發叔話「醜化同褒獎都係一句說話」，要睇完先知喎，真係矛盾。

梁福元：與事實有出入

十八鄉鄉委會主席梁福元就因為髮型問題，被指似林嘉華飾演嘅角色。但梁主席似乎唔太欣賞，話電影乜嘢題材都有，但唔少與事實有出入，唔誇大就吸引唔到人去睇，「星戰（星球大戰系列電影）打到世界末日  ，唔通你又信佢？」

侯志強：同青雲各有千秋

電影中劉青雲被指似上水鄉事委員會主席侯志強，強哥噚日同Emily講話都係得啖笑，仲形容自己同劉青雲「各有千秋」，佢話有時間當娛樂睇吓套電影無所謂，仲話可以請埋發叔一齊去睇！

《竊聽3》最近扮新聞專題節目推出宣傳片，大談最大鄉紳集團陸氏家族，意圖壟斷新界同香港嘅房地產業，又借助內地富豪資金、用暴力手段收地起樓。發叔就笑笑口話，新界無姓陸嘅。梁福元就大爆自己成日畀人竊聽，但自己無作奸犯科，笑住話可能偷聽者「聽聽吓佢都聽到厭」。