迪士尼10月搞光影夜巡遊

【明報專訊】香港迪士尼樂園最近準備新搞作——夜間巡遊「迪士尼光影匯」，會喺10月首次登場，其中《反斗車王》麥坤同《怪獸公司》系列嘅毛毛同大眼仔，更首次喺巡遊亮相，此外唔少得奇妙仙子、小魚仙、貝兒公主、巴斯光年等經典角色。迪士尼發言人話，希望夜間巡遊進一步吸引家庭及年輕客，有助推動入場人次同業務。


以往除咗萬聖節等特別節日，迪士尼都無做過夜間巡遊活動，新項目為配合晚上氣氛，會以「光影匯」為賣點，用高科技做出璀璨燈光效果，光影仲可以沿住美國小鎮大街同遊客互動。


橡皮鴨贏營銷大獎

另外，海港城早前舉辦「橡皮鴨游世界」展覽，吸引全城「追鴨潮」，海港城最近憑住呢項活動，喺國際購物中心（ICSC）全球年度博覽會贏得市場推廣類別中屬最高榮譽嘅最佳市場營銷大獎。