葉劉偕兩黨派義工橫琴鬆一鬆

【明報專訊】新民黨同公民力量自從今年2月宣布結盟之後，噚日首次喺立法會搞聚餐，飯後新民黨主席葉劉淑儀透露，今日會同新民黨同公民力量近千義工一齊去橫琴新開嘅海洋王國玩兩日一夜，輕鬆吓。葉太強調係自費，團費要千幾蚊一位，不過新民黨黨員會有九折。


新民黨公民力量首次聚餐

餐飯食咗差唔多兩粒鐘，大家食完飯都笑到見牙唔見眼，葉太話食飯嗰陣主要討論地區工作，又話為咗準備明年區議會選舉同2016年嘅立法會選舉，會喺6月舉行集思營，傾吓點樣準備選舉同擴大結盟效應。不過葉太最開心莫過於3年人事幾番新，佢話3年前新民黨剛成立時只得一個立法會議員同一個區議員，家連埋公民力量就有兩個立法會議員同32個區議員。


今年新民黨仲會參加沙田區嘅龍舟比賽，Emily問葉太會唔會玩埋一份，葉太笑住話乖女Cynthia會落場參加，佢就負責打氣。