曾主席拒蔣麗芸回吻

【明報專訊】立法會「拉布」戰令唔少議員身心疲憊，適逢噚日同今日分別係民建聯蔣麗芸（Ann姐），同黨友兼立法會主席曾鈺成生日，黨友李慧琼噚日為佢哋搞咗個生日會，舊年生日會曾主席曾經向Ann姐獻吻，一吻化恩怨。今年大家都話Ann姐應該回禮啦，眾人要求Ann姐錫番主席一啖。不過，Ann姐聞言立即耍手擰頭，主席望落都唔多想被人錫，佢話舊年錫咗Ann姐一啖之後，「老婆嬲咗我3日」。


噚日有大批建制派議員到賀，公民黨梁家傑同獨立議員謝偉俊都好畀面出席。


建議訂布形蛋糕一刀「剪布」

曾主席話，生日會可以畀大家苦中作樂嘅機會，大家即刻問「幾時可以脫苦海」，主席笑住話「仲有一段時間」。有唔少人建議下年可以預訂一個「布」形嘅蛋糕，切蛋糕嘅時候就可以順便剪布啦。


笑言生日願望「某議員無聲出」

至於生日願望，曾主席笑住話今年嘅願望「唔係好好心」，「有個議員同我講，如果要佢（即「有個議員」）停止講嘢，一係佢就病咗，一係佢就講到無聲出，我個願望同呢個有關」。Ann姐都笑住話希望大家可以共同建設一個美好嘅香港。