政改谷肥譚志源

【明報專訊】政府首階段政改諮詢結束，由去年12月到今年5月嘅諮詢期，主事官員馬不停蹄去咗超過220場諮詢會，其間要陪議員去上海，又要拍廣告片、落區派傳單，仲有大量文件工作及內部會議，按道理會做到氣咳無啖好食，但政制及內地事務局長譚志源（Raymond）噚日就呻，話呢幾個月竟然脹咗15磅，家有197磅，距離「心理關口」200磅不遠了。睇嚟Raymond要多做運動，記者行家就提議不如跟鄭多燕跳吓健體舞收腰！


Emily噚日見到Raymond，都覺得佢成個人圓咗少少，佢話暴脹係出席太多諮詢會，坐得太多、運動太少所致，家要每周做兩次gym，佢之前去跑步一小時，但發現燒脂效用有限，只相等消耗咗一條炸春卷咁多嘅卡路里！

政改三人組噚日同一眾傳媒見面，總結政改諮詢工作，牽頭嘅政務司長林鄭月娥話，5個月前佢唔熟政制，由Raymond及律政司長袁國強做盲公竹，現時總算上咗手，但仍然只算係半熟手技工喎。林鄭話，首輪諮詢工作完成後，三人組曝光機會會減少啲，但政改嘅廣告宣傳唔會停播，因為年底仲有第二輪諮詢，所以要先「教育」市民認識《基本法》及人大常委就政改嘅決定，咁對政改討論更有幫助。


丘卓恒回歸保安局

為咗政改首輪諮詢，林鄭嘅辦公室曾加添人手，喺保安局搵咗丘卓恒做辦公室助理專員，丘卓恒功成身退，今日last day，返去保安局原有崗位。