張華峰呻報價機收費大細超

【明報專訊】香港立法會金融服務界議員張華峰（圖）噚日同成班行家飯局，理所當然梗係問佢點睇「滬港通」。張華峰就覺得好樂觀，認為畀本地券商提供多一條出路，不過席間張華峰話，家港交所向內地券商提供嘅港股報價機，月費比起向本地券商收取嘅平成一半，每部機差價成150蚊。


張華峰覺得，以前為咗推廣港股，港交所俾返啲「折頭」內地券商就無可厚非，之但係「滬港通」開通之後，兩地券商平起平坐，報價機收費應該公平統一，一係內地加價，一係香港減價，佢仲話，一般經紀行有幾十部至過百部報價機，都咪話唔重皮。


張華峰就話自己未有同港交所（0388）行政總裁李小加反映呢件事。不過小琴就記得，舊年佢地兩位食咗餐飯，據傳就因為報價機費用搞到嗌大交，唔知今次佢地又會為呢件事點傾？


[小琴密語]