新聞類別
港聞
詳情#
【明報專訊】Emily以為記者生涯原是等,點知做政客也要「襟等」,前政務司長、香港2020召集人陳方安生噚日約咗部分溫和泛民傾政改,點知一等就等咗成半個鐘。其實陳太都等咗民主20多年啦,半個鐘應該濕濕碎啫。
18學者一人赴會
香港2020喺5月6日佔中投票放軟手腳,未有拉票,結果與6.22全民投票無緣,不過佢哋近日就好積極咁拉攏溫和泛民共商政改,陳太噚日仲專誠去立法會同公民黨湯家驊,民協馮檢基,公共專業聯盟莫乃光、梁繼昌,同衛生服務界李國麟會晤,陳太仲好積極咁早咗約半小時到立法會,不過一班尊貴嘅議員有啲忙住要應付拉布點人數,有啲又話有其他公務要處理,結果齊齊遲到約10分鐘;至於聯名拋出政改方案嘅18學者,只係派咗一人赴會,由恒生管理學院新聞及傳播學系助理教授陳智傑代表出席。
何俊仁會學聯 左報緊張
另一邊廂,民主黨何俊仁噚日喺立法會同學聯秘書長周永康見面,引起唔少左報記者注意,原來學聯計劃邀請不同政黨出席論壇辯論政改方案,噚日就去咗搵民主黨傾吓安排。
留言 (0)