梁志祥見居民唔見王光亞

【明報專訊】建制派今個月底飯局，將移師深圳前海同南沙做考察，港澳辦主任王光亞同中聯辦主任張曉明將會同建制派議員喺當地見面。但身兼元朗區議會主席嘅梁志祥就去唔到，因為元朗區議會將喺今個月23至24日舉行居民諮詢會，決定元朗區議會點用「社區重點工程」嘅1億元，睇嚟祥哥同兩位主任真係無乜緣。


建制派月底飯局晤張曉明王光亞

祥哥係立法會足球隊高手，但遲啲可能唔止要落場踢波，仲要「落手落腳」搞球會，事關元朗區隊好快就要升甲組，仲搵咗祥哥做咗會長。祥哥話好快就要周圍籌錢，但由於甲組隊伍頭3年都唔會跌番落乙組，所以唔係好擔心，幾百萬都夠用。Emily問過體育版同事，原來呢個升降制仲未落實，我哋拭目以待。


不過，元朗今年11月又搞一場10年先搞一次嘅打醮，到時可能都要「撲水」，唔知祥哥張人情卡可以透支幾錢？