陳肇始接棒 高永文開心

【明報專訊】食物及衛生局長高永文仲有大約1個星期就功成身退，交棒畀副局長陳肇始，佢哋合作咗5年，而且理念相近，佢話唔使特別準備都會交接順利。
食衛局噚日安排咗傳媒茶敘，等高永文同大家say goodbye。高永文話，非常感激兩位拍檔副局長陳肇始同政治助理陳凱欣，喺過去5年幫咗佢好多，例如同各界溝通、推銷政策等，有時仲唔使驚動佢就拆咗彈。佢話好開心交棒畀陳肇始，因為兩人嘅民生政策理念好相似，相信唔使特別準備，已經可以順利交接。
高永文離開政府之後，計劃重操故業，家密鑼緊鼓準備緊開診所。佢話作為醫療界一分子，會繼續支持政府工作，但全職做公職就機會微啲喇。
至於新出爐嘅候任食衛局長陳肇始，噚日無證實邀請公立醫院醫生做副局長嘅傳聞，只係話新團隊組成之後會盡快公布，希望團隊成員可以互補。