迪士尼新舞台劇賀10歲

【明報專訊】今年係香港迪士尼樂園10周年，香港迪士尼樂園度假區娛樂事務及服務總監David Lightbody話，11月會展開為期1年嘅慶祝活動，頭炮係全新舞台表演《迪士尼魔法書房》，呢套新劇會加添《魔雪奇緣（Frozen）》嘅元素。咁有無Elsa同Anna呢？佢就賣關子唔肯講。


米奇音樂劇7．26告別

David話為咗迎接新發展，樂園入面最受歡迎嘅表演《米奇金獎音樂劇》將於7月26日告別舞台，到時會有特別嘅儀式，歡送呢個開幕以來演出超過19,000場嘅表演，但歡送詳情就唔肯講。


新嘅《迪士尼魔法書房》喺11月開始，講述米奇同高飛發現一本可以將故事內容變成現實嘅魔法書，仲意外將《魔雪奇緣》嘅雪人Olaf帶到現實世界，米奇於是走入書中世界，嘗試將Olaf帶返入故事之中。David話，會有唔同嘅新角色喺劇中出現，至於大受歡迎嘅Elsa同Anna會唔會出現，佢話要保持神秘感，唔方便透露喎。


10周年除咗有新表演，仲有新角色入園，包括《勇敢傳說》嘅Merida同《大英雄聯盟》嘅Baymax同Hiro，佢哋會喺樂園內同人影相。Emily仲知道，迪士尼近日推出以新動畫《玩轉腦朋友》同《魔雪奇緣》為主題嘅一系列紀念品，預計銷情會唔錯。