九巴龍舟隊 57歲老手戰績多

【明報專訊】聽日端午節，城門河、赤柱正灘等地方都有龍舟競渡賽事，吸引唔少團隊參賽，當中1991年組成嘅九巴龍舟隊今年係第25年參賽，隊內年資最高、57歲嘅九巴車長張志文，由1992年加入龍舟隊後年年參賽，仲幾乎年年獲獎，至今參與過不下80項本地同海外龍舟競賽，曾代表九巴到內地、日本等地參賽。


難忘冰上爬舟三峽耐力競渡

入職27年嘅張志文話當年都係好奇加入龍舟隊，玩玩吓逐漸產生濃厚興趣，轉眼就玩咗25年。作為隊內元老，佢負責坐「龍頭」指揮隊員划槳，「練槳法最辛苦，要一齊落一齊拉，如果一個高一個低，會令龍舟好搖，好講求團隊精神」。


問佢最難忘邊場賽事，佢話有次去吉林省參與龍舟拉力賽，當時氣溫得-30℃，河面結晒冰，要戴手套同著晒禦寒衣物作賽，另一次就喺長江三峽玩30公里龍舟競渡，全程划咗兩個幾鐘頭，好考驗耐力。佢講明會繼續玩龍舟直至退休，仲講笑話退休後希望有機會返嚟教隊員。