劉鑾雄崔世安同場 賀岳少嫁女

【明報專訊】全國政協常委、星島新聞集團主席何柱國個仔何正德，早前同旅發局主席林建岳長女林恬兒喺法國註冊結婚，噚日喺灣仔君悅酒店辦結婚酒會，政、商、演藝界等名人到賀。冠蓋雲集嘅場面，造就早前被澳門法院裁定行賄及洗黑錢罪成、正上訴嘅華置前主席劉鑾雄，與澳門特首崔世安同場出現，兩人喺酒店禮堂同場近半小時後，離開時都無回應提問，唔知佢哋有無機會喺酒會中碰面。


澳門判洗錢罪成 劉正上訴

噚日酒會熱鬧，3任特首梁振英、董建華，以及久未公開露面、拖住太太嘅曾蔭權都喺度；澳門兩任特首崔世安、何厚鏵亦有嚟。其他出席者仲有選過特首嘅政協常委唐英年、盛傳會出選特首嘅前財政司長梁錦松，同埋長和系主席李嘉誠與大仔李澤鉅等等。


5港澳特首齊露面

Emily見到中聯辦主任張曉明現身，想捉住張主任問佢點睇佔中6．22全民投票，點知Emily未問完，張主任拋低一句「還好」就走咗。至於港府官員，財政司長曾俊華、律政司長袁國強、政制及內地事務局長譚志源都有出席，三人都笑而不語，譚志源最後同民主黨涂謹申老友鬼鬼，搭晒膊頭一齊閃走咗。同場仲有好多商界及娛樂圈人士。