新App過吓消防癮

【明報專訊】唔少政府部門及紀律部隊都有推出智能手機App，噚日連消防處都推出咗手機App，雖然唔可以用嚟通知消防處邊度有火警，但都有唔少實用資訊，例如港九新界各區消防局及救護站位置、防火資訊等，仲有一啲關於消防救火嘅遊戲畀市民下載。


有全港消防局救護站位置

Emily睇咗一輪，發覺有個「消防相機」環節比較好玩，市民可以拍照後key自己個樣落去，化身消防員或救護員，又或者同消防救護可愛卡通合照；App亦有招聘資訊，睇到有邊啲消防救護或工程職位空缺。有興趣嘅市民，可到App Store或Google Play下載「消防處流動應用程式」。